Atvinnuástandið á Akureyri

Stundum blöskrar manni framsetning frétta sérstaklega þegar haft er eftir ábyrgum aðilum fréttir sem stangast á við hvað opinberar tölur segja.  Í Vikudegi s.l. fimmtudag er fjallað um vaxandi atvinnuleysi á Akureyri og þar segir orðrétt:  “Þróunin allt þetta ár hefur verið niður á við og hefur atvinnulausum fjölgað jafnt og þétt frá áramótum”  Þetta er ekki hægt að skilja á annan veg en að hér sé vaxandi atvinnuleysi og þróunin hafi verið neikvæð frá áramótum.  Vissulega er það rétt að atvinnuleysi sem af er þessu ári er meira en það var á sambærilegum tíma í fyrra.  En þess ber að geta að atvinnuleysi  frá miðju ári 1999 til s.l. áramóta var í sögulegu lámarki og sennilega ekki til hliðstæða þess frá því byrjað var að skrá atvinnuleysi í landinu og ber að fagna því.

En hverri hagsveiflu fylgir samdráttur og hefur atvinnulífið ekkert farið varhluta af því á þessu ári.  Það gleðilega við þetta er þó sú vissa að innan skamms, með fyrirsjáanlegum framkvæmdum á Austurlandi, má búast við fjölgun starfa og minnkandi atvinnuleysi.  En snúum okkar þá næst að atvinnuástandinu á Akureyri frá því í byrjun árs 2001 til dagsins í dag.  Samkvæmt opinberum tölum eru aðeins þrír mánuðir á þessu tímabili með betra atvinnuástand en er í lok ágúst 2002.

Varast ber að mála skrattann á vegginn sérstaklega þegar horft er til þess að atvinnuástandið í lok ágúst 2002 er viðunandi, ef einhvern tímann er hægt að sætta sig við atvinnuleysi. 

Sem sjá má á línuritinu þá er atvinnuleysið vaxandi í Reykjavík á meðan þróunin hérna hefur verið sú að atvinnuástandið er komið niður fyrir hvað landsmeðaltal.  Það hlýtur að teljast jákvætt og ekkert í kortunum sem bendir til að það muni versna.  Af vinnumarkaði í september fara framhaldsskólanemar sem flestir teljast sumarafleysingafólk en alltaf verða einhver viðvarandi störf til sem þá losna á þessum tíma og þannig lagast ástandið eitthvað.  Nú stendur sláturtíð yfir og þar verða störf fram undir áramót.

Íbúaþróun og fasteignamarkaðurinn

Samkvæmt heimasíðu Hagstofunnar þá voru aðfluttir umfram brotflutta á fyrstu sex mánuðum ársins til Akureyrar alls 61.  Aðeins eitt ár af síðustu fimm sýnir betri útkomu eftir sex mánuði.  Íbúafjölgunin á síðustu tveimur árum er um 1,6%  fólksfjölgun en landsmeðaltal síðustu 10 ára er um 1%.  Menn gera sér ekki alltaf grein fyrir því hve hreyfingin er mikil á fólki, en tilkynningar um aðseturskipti á Akureyri eru um 1200 á hverju ári. 

Þess vegna bregður manni við þegar blaðið fer að fjalla um fasteignamarkaðinn.  Ekki veit ég við hvaða fasteignasala blaðið ræddi en sú athugun sem undirritaður setti í gang strax í morgun leiddi í ljós að nóg væri að gera hjá flestum fasteignasölum bæjarins, nýbyggingar rjúka út, skortur á ákveðnum eignum og þótt að einstaka eignir séu erfiðar í sölu einhvern tíma þá selst allt að lokum.  Það er ekki almenna reglan að fólk sitji uppi með húsnæðið sitt einhvern óratíma og flutningstölur styðja ekki þá fullyrðingu sem fram kemur um að aðfluttir fylli ekki í skörðin.   Það er slæm fréttamennska að setja allt fram með neikvæðum formerkjum og ætlast ég til þess að fréttamenn Vikudags sýni af sér faglegri vinnubrögð en voru viðhöfð í þessari forsíðufrétt.  Það er enginn að biðja um fréttafölsun en rétt skal vera rétt og sett fram með þeim hætti að fólk mistúlki ekki hvað sagt er. Við hér hjá Atvinnuþróunarfélagi Eyjafjarðar höfum áður varað við því að tala okkur ekki inn í kreppu þegar engar efnahagslegar forsendur eru fyrir því. Eins og fram kom í fréttum nú fyrir helgi eru greiningarstöðvar bankanna að fagna því að botninum virðist vera náð í niðursveiflu sem óttast var að yrði miklu dýpri.

Eins og almenningur veit er að fara í gang sérstök byggðaáætlun fyrir Eyjafjörð sem kjarnabyggð fyrir Norðurland. Hvað það færir okkur er ekki ljóst á þessu stigi en væntingar standa til að svæðið eflist og þar með tryggir búseturskilyrði fólks á Norðurlandi. Ennfremur má nefna að hugmyndir eru líka uppi um stórframkvæmdir á Norðurlandi hvað varðar stóriðnað og ef af slíkum hugmyndum verður er enn nýjum stoðum skotið undir efnahagslegan vöxt og framgang svæðisins.